Қорытынды жұмыс қуантады, алдағы міндеттер де ауқымды

Итоговый
14 ақпан 2018

Қорытынды жұмыс қуантады, алдағы міндеттер де ауқымды

 

Аудан әкімі Қ.Ә.Досаевтың ауданның әлеуметтік-экономикалық даму қорытындысы туралы аудан тұрғындары алдындағы екі аптаға созылған есептік кездесуі өз мәресіне жетіп, өткен аптаның жұмасында аудандық Мәдениет үйінде қорытынды жиынмен аяқталды. Қорытынды есептік кездесуге облыс әкімінің орынбасары М.Т.Мұсаев арнайы келіп қатысты. Сондай-ақ, залға облыстық және аудандық мәслихат депутаттары, аудан әкімінің орынбасарлары, бөлім және мекеме басшылары, ауылдық округ әкімдері, үкіметтік емес ұйым, денсаулық сақтау, білім беру, спорт салаларының қызметкерлері, кәсіпкерлер, ардагерлер мен жастар қауымы және БАҚ өкілдері жиналды.

Күн тәртібіндегі мәселе –  ауданның 2017 жылғы әлеуметтік-экономикалық даму қорытындылары бойынша Қайрат Әскербекұлы баяндама жасап, көпшіліктің алдында аудан көлемінде жыл ішінде атқарылған жұмыстар жайында есеп берді. Жалпы алғанда қол жеткізген экономикалық даму көрсеткіштері көптің көңілінен шықты. Себебі, аудан экономикасы үшін маңызы зор салалардың басым бөлігінің орындалу пайызы жүз пайыздан жоғары көрсеткішке ие болды. Ал алдағы жоспар бойынша «Битум», «Қант қызылшасы мен қант құрағын өңдеу, қант және лимон қышқылын шығару», «Комбайн құрастыру» зауыттары мен «Глифосат және үштекті фосфор хлоры өндірісі біріктірілген химиялық кешені» сынды ауқымды жобаларды жүзеге асыру өнім көлемін одан әрі арттыра түсетіні сөзсіз. Сонымен қатар, денсаулық сақтау, білім беру, спорт, мәдениет салаларына қатысты жаңа құрылыс нысандарының қолға алынуы да ауданның ажарлануына сеп болмақ.

Аудан басшысының мазмұнды баяндамасы аяқталғаннан кейін қатысушылар тарапынан қойылатын сұрақтарға кезек берілді. Әлем халықтары Жазушылар одағының мүшесі Мәкен Уақтегі бірінші болып сөз алып, өңіріміздегі қол жеткен толайым табыстарды, тындырымды тірліктерді, нәтижелі істерді мақтаныш сезіммен атап өтіп, аудан басшысына ағалық ақ тілегін жаудырды. Облыстық мәслихат депутаты, Құрметті теміржолшы Тұрсынбай Халық та алдымен ризашылығын білдіріп, өз ұсынысын ортаға салды. Оның ойынша, ауданда шұжық цехы мен макарон өнімдерін өндіретін кішігірім кешен салынып, әлеуметтік жағдайы төмен отбасылар мен көпбалалы аналарға және қарт кісілерге төмен бағамен берілсе халық әлеуетінің жақсаруына пайдасы тимек. Осыдан кейін мінберге көтерілген аудандық ардагерлер ұйымы кеңесінің төрағасы Қазақбай Байжұманұлы да өңір басшысының есептік баяндамасын «өте жақсы» деп бағалап, көкейінде жүрген мәселені айтты. Ол шаруаларды техникамен қамтамасыз ету, олардың мемлекеттік бағдарлама бойынша несие мен субсидия алуларына жәрдемдесу, асыл тұқымды мал санын көбейту үшін қолдан ұрықтандыруды қолға алу  сынды мәнді мәселелерді көтеріп, осыларға жіті көңіл бөліну қажеттігін тілге тиек етті.

Сұрақ қоюшылардың қатарында ауданның атын төл туындыларымен әйгілі еткен суретші-мүсінші Қали Қораласбаев аудан орталығында ат үстінде отырған батыр ескерткішінің жоқтығын айтып, егер ескерткішті орнату қолға алынатын болса ол мүсінге қара қылды қақ жарған Бөлтірік шешеннің лайықты екендігін, ол ұсынысын көпшілік қолдап жатқандығын жеткізді. Сондай-ақ, аудан атынан облыс және республика көлемінде көрме өткізіп жүрген өнер саңлағы жеке шеберханасының жоқтығы кейде қолбайлау болып жататындығын жасырмады. Жеке шеберханасы мен ауданның өз галереясы ашылатын болса өзінің жүз туындысын галереяға сыйға тартып, өзге де қылқалам мен қолөнер шеберлерінің жұмыстарын жинап беретініне сендірді. Бұл ұсынысты құп көрген Қайрат Әскербекұлы шешімін табуға тырысатынын айтты.

Өзін «блогермін» деп таныстырған, облыс орталығынан келген қонақ Исламбек Дастан «Ешбір салық төлемей отырған «Шатыркөл» кен орны биыл ауданға қанша қаражат түсірді?», «Қонаев ауылына апаратын көпір неге әлі күнге жөндеу көрмеген?» деген сауалдар қойды. Аудан басшысы «Шатыркөл» кен орны тікелей ауданға қарамағандықтан пайда түспейтіндігін және Қонаев ауылына апаратын көпір облыстық бюджеттің балансында тұрғандықтан оны ауданның қаражатына жөндеу заңсыз болатындығын түсіндірді.

Сұрақ-жауап легі аяқталғаннан кейін қорытынды сөз сөйлеген Мәден Тоқтарбайұлы жыл бойы атқарылған жұмыстарға қанағаттанарлық бағасын беріп, жұмыс қарқыны жалғаса беру қажеттігін ескертті.

Балнұр ЖЕКСЕНБЕКҚЫЗЫ.

Суреттерде: қорытынды есептен көріністер.

Соңғы жаңалықтар

IMG_7018 ҚОҒАМ
12.09.2018

Өзекті мәселелерді бақылауға алды БЕЙСЕНБІ КҮНІ ОБЛЫС ӘКІМІНІҢ ТАПСЫРМАСЫ БОЙЫНША, АРНАЙЫ БЕКІТІЛГЕН КЕСТЕГЕ САЙ АУДАНЫМЫЗҒА ОБЛЫС ӘКІМІНІҢ БАС ИНСПЕКТОРЫ ТЕРЛІКБАЕВ ӘЛІБЕК МАМЫТЖАНҰЛЫ КЕЛІП, ЖЕРГІЛІКТІ ТҰРҒЫНДАРМЕН КЕЗДЕСУ ӨТКІЗДІ (СУРЕТТЕ). «НҰР ОТАН» ПАРТИЯСЫ АУДАНДЫҚ ФИЛИАЛЫНЫҢ МӘЖІЛІС ЗАЛЫНДА ӨТКЕН ЖИЫНҒА АҒА БУЫН ӨКІЛДЕРІНЕН ҚҰРАЛҒАН ТӨЛЕ БИ АУЫЛЫНЫҢ ТҰРҒЫНДАРЫ ҚАТЫСТЫ. Төле би ауылдық округінің әкімі Е.Даберов жиынды ашып, облыстан келген қонақты таныстырып, көпшілікті жиынға белсене атсалысуға шақырды. Мұнан кейін сөз кезегін алған Ә.Терлікбаев: -Бүгінгі кездесудің мақсаты – ауылдың тыныс-тіршілігін назарға алып, тұрғындардың мемлекеттік мекемелер басшыларының халықпен байланысы, мекемелердің қызмет сапасы жөніндегі ойларын, оларға қатысты сын-пікірлерін тыңдап, елді мекендегі өзекті мәселелерді жоғарғы билік өкілдеріне жеткізіп, оңынан шешілуіне ықпал ету,-деп атап өтті. Сұрақ-жауап кезеңінде алғашқы болып сөз алған аудандық ардагерлер ұйымы кеңесінің мүшесі М.Шалғынбаев бірнеше уақыттан бері нақты шешімі табылмай келе жатқан көгілдір отынның құнына байланысты ойын ортаға салды. Сондай-ақ, осы сұрақ төңірегінде М.Уақтегі, Н.Бердиев, Ә.Орманов, И.Алиев сынды аға буын өкілдері де пікірлерімен бөлісті. Мысалы, М.Шалғынбай жоғарыдағы билік органдарына 1200-ден астам адамның қолы қойылған хат жіберілсе де, әлі күнге дейін ешбір оң нәтиже жоқтығын айтса, Н.Бердиев өзге аудандарда халықтың көңілінен шықпаған мердігер ұйым ол жерде жұмыс жасамайтындығын, ал бізде «Париев» ЖШС әлі де өз жұмысын жалғастырып отырғандығына ренішін жеткізді. Оның айтуынша, ауыл ішіндегі қалтасы қалың азаматтар көгілдір отынға қосылып, игілігін көруде, ал бір зейнетақыға қарап отырған зейнеткелер мен қаржылық мұршасы жетпейтін өзге де тұрғындар тек арман жетегінде келеді. Сондай-ақ, И.Алиев көгілдір отынға қосылу бойынша Ұлы Отан соғысына қатысушыларға теңестірілгендерге жеңілдік бар-жоғын сұраса, Ә.Орманов осыдан бірнеше жыл бұрын өз көшесіне орнатылған су құбырларының бірнеше жерден жарылып, әлі күнге дейін су атқылап тұратындықтан, су құбырларын түбегейлі жаңарту, «Аша» тұрғын алқабындағы көше жолына асфальт төсеу қажеттігін, өйткені, кешкі уақытта көшенің шаңынан таза ауамен тыныстауға мүмкіндік жоғын жеткізді. Сондай-ақ, аудандық қоғамдық кеңес төрағасы Е.Досымбаев Төле би ауылындағы жер асты суының көтерілу мәселесін алға тартып, оның алдын алмаса, жерді қамыс басып, шамамен бес жылдан соң тұрғындар 1000 гектар жерден айырылып қалатындығын айтты. Осы және өзге де ұсыныс-пікірлерді мұқият тыңдаған Әлібек Мамытжанұлы жер асты суының көтерілуі шын мәнінде мәнді мәселе екендігін айтып, алдағы уақытта облыс орталығында өтетін үлкен жиынға Е.Досымбаевты шақырып, мәселенің шешімін табуды сол жерде бірге қарастыратындығын жеткізді. Көше жолын асфальттау бойынша округ әкімі Е.Даберов қанағаттанарлық жауап берсе, Әлібек Мамытжанұлы көгілдір отынға қосылу құнын арзандату яғни, көпшіліктің аузынан түспей жүрген 82 756 теңге жөнінде жан-жақты зерделеп, жақын арада жауабын айтатындығын мәлімдеді. Динара БАТЫРХАИРОВА. Суретті түсірген автор.

Бейсенбі күні облыс әкімінің тапсырмасы бойынша, арнайы бекітілге...

Телефон қабылдау

8 (72638) 3 10 75