Ғалымдардың келелі кеңесі

_APR4520
13 сәуір 2017

Ғалымдардың келелі кеңесі

Ғалымдардың келелі кеңесі

Кеше аудандық Мәдениет үйінде аудан әкімі Қайрат Әскербекұлы Досаевтың төрағалығымен Қазақстан егіншілік және өсімдік шаруашылығы ғылыми зерттеу институтының жетістіктерін ауданы-мыздың өндірісіне енгізу мақсатында семинар өтті (суретте). Жиынға жоғарыда аталған институттан, облыс әкімдігінің ауыл шаруашылығы басқармасынан, «Ауыл шаруашылығын қаржылай қолдау қоры»АҚ және «Аграрлық несие корпорациясы» АҚ Жамбыл филиалының қызметкерлерінен құралған жұмысшы топ келді. Кең көлемде ұйымдастырылған жиынға аудан әкімдігінің бөлім басшылары, Шу қаласы мен ауылдық округ әкімдері, ауыл шаруашылық құрылымдарының және шаруа қожалықтарының басшылары қатысты.

Қайрат Әскербекұлы жиынның мақсатымен және қонақтармен қатысушыларды таныстырғаннан кейін, зерттеу орталығынан арнайы келген академик, ғалымдармен тығыз байланыс орнатып, олардың ұсынысы мен тәжірибесін пайдалану арқылы аудандағы ауыл шаруашылығы саласын арттыру қажеттігін атап өтті. Осыдан кейін сөз кезегін Қазақстан егіншілік және өсімдік шаруашылығы ғылыми зерттеу институтының директоры С.Б.Кененбаевқа берді. Ол институт ғалымдарының ауыл шаруашылығына енгізілетін инновациялары туралы арнайы дайындалған слайдтар арқылы жан-жақты түсіндіруге тырысты.

Алдымен ауыл шаруашылығы бағытындағы институттың тарихымен, құрылымымен таныстырудан бастаған Серік Барменбекұлы Жамбыл облысындағы егіншілік саласының негізгі проблемаларына, ауыл шаруашылығын пайдалануда топырақ құнарлылығының өзгеруі және тыңайтқышты қолданудың тиімділігі, өсімдік шаруашылығын әртараптандыру, аудандағы егістік алқаптарының құрылымы, онда өсіруге ұсынылатын жаңа сорттар мен будандар, өндірісте пайдалануға рұқсат етілген қант қызылшасы будандарының салыстырмалы көрсеткіштеріне жеке-жеке тоқталып өтті.

– Жамбыл облысында егіншілік саласына қатысты бірнеше мәселелер орын алуда. Атап айтқанда, су қорының азаюы, жерді суландыру жүйелерінің тозуы, топырақ жамылғыларының төзімсіздігі, жыл сайын егін шаруашылығындағы қарашіріктің азаюы және тағы сол сияқтылар. Соның ішінде қарашіріктің азаюы шаруалардың ауыспалы егісті, техникаларды  дер кезінде пайдаланбауынан болады. Бұл – топырақ құнарлылығының азаюына әкеп соғады. Оның алдын алу үшін минералды тыңайтқышты арттыру аса қажет, – деп түсіндірді Серік Барменбекұлы.

Сондай-ақ, маманның айтуынша, біздің өңірдегі егістік алқабының құрылымы 2012 жылы 79,3 мың гектар болса, ол биылғы жылы 98 мың гектарға дейін ұлайған екен. Яғни, бұл қуанышты жайт пайдаланылмай жатқан жерлер қайта орнына келтіріліп жатыр дегенді білдіреді.

Қазіргі таңда шетелден алып келетін қызылша тұқымдарына сұраныс көбірек екен. Бірақ оның бағасы қымбат. Осыған байланысты тәтті түбір тұқымының будандары аталмыш институтта шығарылып жатыр. Өзіміздегі буданның қанттылығы, өнімділігі шетелдікінен кем емес көрінеді. Тек бір әттеген-айы ауруға төзімсіздігінде. Дегенмен, институт мамандары қарап отырмай осы бағытта да жұмыс жасау үстінде.

Институт ғалымдары біздің ауданнан басқа облысқа қарасты көптеген аудандармен тығыз байланыс орнатып, өз сорттарын ұсынған екен. Сол секілді біздегі егіс алқаптарында да сапалы өнім шығаруға көмек көрсетуге дайын. Олардың да өзіндік шарттары бар. Нақтырақ айтқанда, мамандар өз сорттарын егіс алқабына алып келіп, 5-10 гектарға тұқымды тегін түрде егіп көрсетеді. Кейін алынған өнімнің тең жартысын өздеріне қайтарып алады. Буданның бейімділігіне көз жеткізілгеннен кейін оны ары қарай көбейтіп, дамытуға болады.

Семинар барысында басқа да білікті мамандар кезекпен өз баяндамаларын оқып, қатысушыларды біраз жайттан хабардар етті. Атап айтқанда, жоғарыда аталған зерттеу институтының жемшөп және майлы дақылдар бөлімінің басшысы М.Т.Галиолла жоңышқа мен майлы дақылдарды егу, күтіп-баптау, сапасын арттыру, астық және бұршақ тұқымдастар бөлімінің басшысы М.С.Құдайбергенов майлы бұршақ, соя дақылын ауданда қайта жандандыру, білімді насихаттау және ғылыми жетістіктерді өндірісте енгізу бөлімінің басшысы С.Қ.Қалтаев егіс алқаптарында қолданылатын техникаларды дұрыс пайдалану жайында айтып өтті. Сондай-ақ, облыс әкімдігі ауыл шаруашылығы басқарма басшысының орынбасары Е.Е.Құлкеев пен басқарманың мал шаруашылығы бөлімінің бас маманы С.Т.Сүлейменов те өз ойларын ортаға салды. Сөз сөйлеушілердің қатарында болған «Ауыл шаруашылығын қаржылай қолдау қоры»АҚ Жамбыл филиалының директоры Ө.Х.Оразымбетов, «Аграрлық несие корпорациясы» АҚ Жамбыл филиалының директоры Н.Е.Сейітбеков, «Атамекен» ұлттық кәсіпкерлер палатасы Шу қалалық филиалының директоры А.Қомаев, «Шу несие серіктестігі» ЖШС-нің басшысы Е.Ә.Досымбаев несиелендіру жайында жан-жақты түсіндірді.

Жиын соңында аудан басшысы:

-Елбасы Н.Назарбаев биылғы Жолдауында аграрлық сектор экономиканың жаңа драйверіне айналу қажеттігін атап өтті. Осы бағытта біз көп жұмыс жасауымыз керек. Ол үшін сапалы тұқым себу, жаңа техника түрлерін көбейту, суды үнемдеу технологиясын ұтымды пайдалану, соя өсіруді қолға алу, кооперативтерге бірігу аса қажет. Жалпы, қандай жұмыс болса да бірігіп атқара білейік, – деді.

Ғалымдар қазіргі уақыт сорттардың өтіп кеткен мерзімі болғандықтан, кейбір тұқымдарды тауып беруге, ғылыми кеңестер беруге уәде берді. Қайрат Әскербекұлы орынбасары Әлихан Балқыбековке ғалымдармен тығыз байланыс орнатып, бір шаруа қожалығына тәжірибе жүргізуді тапсырды.

Балнұр ЖЕКСЕНБЕКҚЫЗЫ.

Суретте: семинардан көрініс.

Сурет П.Норкиндікі.

Соңғы жаңалықтар

IMG_7018 ҚОҒАМ
12.09.2018

Өзекті мәселелерді бақылауға алды БЕЙСЕНБІ КҮНІ ОБЛЫС ӘКІМІНІҢ ТАПСЫРМАСЫ БОЙЫНША, АРНАЙЫ БЕКІТІЛГЕН КЕСТЕГЕ САЙ АУДАНЫМЫЗҒА ОБЛЫС ӘКІМІНІҢ БАС ИНСПЕКТОРЫ ТЕРЛІКБАЕВ ӘЛІБЕК МАМЫТЖАНҰЛЫ КЕЛІП, ЖЕРГІЛІКТІ ТҰРҒЫНДАРМЕН КЕЗДЕСУ ӨТКІЗДІ (СУРЕТТЕ). «НҰР ОТАН» ПАРТИЯСЫ АУДАНДЫҚ ФИЛИАЛЫНЫҢ МӘЖІЛІС ЗАЛЫНДА ӨТКЕН ЖИЫНҒА АҒА БУЫН ӨКІЛДЕРІНЕН ҚҰРАЛҒАН ТӨЛЕ БИ АУЫЛЫНЫҢ ТҰРҒЫНДАРЫ ҚАТЫСТЫ. Төле би ауылдық округінің әкімі Е.Даберов жиынды ашып, облыстан келген қонақты таныстырып, көпшілікті жиынға белсене атсалысуға шақырды. Мұнан кейін сөз кезегін алған Ә.Терлікбаев: -Бүгінгі кездесудің мақсаты – ауылдың тыныс-тіршілігін назарға алып, тұрғындардың мемлекеттік мекемелер басшыларының халықпен байланысы, мекемелердің қызмет сапасы жөніндегі ойларын, оларға қатысты сын-пікірлерін тыңдап, елді мекендегі өзекті мәселелерді жоғарғы билік өкілдеріне жеткізіп, оңынан шешілуіне ықпал ету,-деп атап өтті. Сұрақ-жауап кезеңінде алғашқы болып сөз алған аудандық ардагерлер ұйымы кеңесінің мүшесі М.Шалғынбаев бірнеше уақыттан бері нақты шешімі табылмай келе жатқан көгілдір отынның құнына байланысты ойын ортаға салды. Сондай-ақ, осы сұрақ төңірегінде М.Уақтегі, Н.Бердиев, Ә.Орманов, И.Алиев сынды аға буын өкілдері де пікірлерімен бөлісті. Мысалы, М.Шалғынбай жоғарыдағы билік органдарына 1200-ден астам адамның қолы қойылған хат жіберілсе де, әлі күнге дейін ешбір оң нәтиже жоқтығын айтса, Н.Бердиев өзге аудандарда халықтың көңілінен шықпаған мердігер ұйым ол жерде жұмыс жасамайтындығын, ал бізде «Париев» ЖШС әлі де өз жұмысын жалғастырып отырғандығына ренішін жеткізді. Оның айтуынша, ауыл ішіндегі қалтасы қалың азаматтар көгілдір отынға қосылып, игілігін көруде, ал бір зейнетақыға қарап отырған зейнеткелер мен қаржылық мұршасы жетпейтін өзге де тұрғындар тек арман жетегінде келеді. Сондай-ақ, И.Алиев көгілдір отынға қосылу бойынша Ұлы Отан соғысына қатысушыларға теңестірілгендерге жеңілдік бар-жоғын сұраса, Ә.Орманов осыдан бірнеше жыл бұрын өз көшесіне орнатылған су құбырларының бірнеше жерден жарылып, әлі күнге дейін су атқылап тұратындықтан, су құбырларын түбегейлі жаңарту, «Аша» тұрғын алқабындағы көше жолына асфальт төсеу қажеттігін, өйткені, кешкі уақытта көшенің шаңынан таза ауамен тыныстауға мүмкіндік жоғын жеткізді. Сондай-ақ, аудандық қоғамдық кеңес төрағасы Е.Досымбаев Төле би ауылындағы жер асты суының көтерілу мәселесін алға тартып, оның алдын алмаса, жерді қамыс басып, шамамен бес жылдан соң тұрғындар 1000 гектар жерден айырылып қалатындығын айтты. Осы және өзге де ұсыныс-пікірлерді мұқият тыңдаған Әлібек Мамытжанұлы жер асты суының көтерілуі шын мәнінде мәнді мәселе екендігін айтып, алдағы уақытта облыс орталығында өтетін үлкен жиынға Е.Досымбаевты шақырып, мәселенің шешімін табуды сол жерде бірге қарастыратындығын жеткізді. Көше жолын асфальттау бойынша округ әкімі Е.Даберов қанағаттанарлық жауап берсе, Әлібек Мамытжанұлы көгілдір отынға қосылу құнын арзандату яғни, көпшіліктің аузынан түспей жүрген 82 756 теңге жөнінде жан-жақты зерделеп, жақын арада жауабын айтатындығын мәлімдеді. Динара БАТЫРХАИРОВА. Суретті түсірген автор.

Бейсенбі күні облыс әкімінің тапсырмасы бойынша, арнайы бекітілге...

Телефон қабылдау

8 (72638) 3 10 75